عرض مصدر خليل وزين من حفلة المتين

من حفلة المتين 

== [[زين شعيب]] ==

واحد عا اسمو حط آمالو

وواحد بروحو كل رسمالو

وانتو انصفو بالفرق يا اخوان

مابين جسم الشخص وخيالو

بالاسم صاحبنا خليل طمعان

شو هالذكاوي الفيه نيالو

مش لايمو يمكن يكون فهمان

وخالو ذكي طالع على خالو

حاجه ياروكز بالاسم وهمان

من حروف حبر على ورق سالو

اسمك اذا شطبتو من الإعلان

ورسمك بقي بيبقى على حالو

ومحل روكز اكتب سليمان

أو جورج مابيبوخ مودالو

بالاسم مهما عملت مش خسران

لولا حرقتو شو على بالو

مليون اسم بساعتين زمان

بترشهن عالبي وعيالو

وبتمون الزنكيل والطفران

لكن اذا جسمك نزل عالقبر

صعبه عليك تعوض بدالو


== [[خليل روكز]] ==

ما أطولك ياليل أحزاني

عاهيك منطق شِعر وغناني

وين الحقايق والضماير وين

نامت وعين البطل سهراني

وين المعري وعقل طه حسين

واليازجيه وعقل جبراني

يروحو يجيبو مجمع البحرين

ويرصعوه بدِرّ قصداني

نكرت الاسم يازين كيف لك عين

وحطيت جسم بعينة التاني

بحيث الاسم عندك مرجح عين

وبتريد متلك بيع وجداني

جبلي جسم حيدر أبو السبطين

وجسم عنتر عبس أو هاني

أو دلني عاجسم طير البين

وعالأنبيا العطيو الدني دياني

ماتو وضل الإسم جوهر عين

والله إنعرف بالإسم روحاني

مافي جسم خالد على الحالين

اخلص بقى من الوهم منشاني

وتاينتهي هالبحث بين تنين

بين الجني للحق والجاني

وحتى تآمن بالإسم يازين

فتش تواريخ الدني بتشوف

الإسم خالد والجسم فاني


[[تصنيف:زين شعيب]]
[[تصنيف:قصائد زين شعيب]]
[[تصنيف:محاورات زين شعيب]]
[[تصنيف:حفلات زين شعيب]]
[[تصنيف:خليل روكز]]
[[تصنيف:قصائد خليل روكز]]
[[تصنيف:محاورات خليل روكز]]
[[تصنيف:حفلات خليل روكز]]
[[تصنيف:قصائد]]
[[تصنيف:حفلات]]
[[تصنيف:محاورات]]