الفقر
قصيدة للشاعر خليل روكز
الفقر
هي مش خطايا أمرها علينا عسير
متل ما بيشوفها العقل الزغير
الكفر ساعة ما بتعطف عا ضرير
وبتشتهيلو عيون تا يرجع بصير
عيفو بلا عينين في عيشو المرير
مش كل طير بهالدني لازم يطير
دشّرو للكوّنو بأمرو خبير
لا تشتهيلو النور والخير الوفير
نحنا ع درب الحظ جدينا المسير
لمين الطبيعة مخلفي شوك و حرير
يا معترف بالرب ومقامو الخطير
بينعدّ عطفك كفر عالعبد الحقير
يما اعترف بيضعفك وابقى اسير
للآله وكلّفو الدفّي يدير
يما تفضل مدّ هالباع القصير
وزيح الستار وبيّن السرّ الأخير
واظهر الوهيتك بحرّية الفكار
وحتى تشوف الكفر كيف بيبتدي
الكفر لما عا الخليقة بتعتدي
ولما بتقتل سبع تا تطعم جدي
وتبتسم بشفافك وقلبك ردي
وبتضيع حتى تهتدي وما بتهتدي
وبتعيش عمرك لا سراب ولا ندي
الكفر لما بشعب اعمى بتقتدي
وبتضل عا درب الضلال السرمدي
مع ناس عادي عا العباده معودي
توب الأصول فكارها ما بترتدي
هيدا الكفر مش كفر لو المتلي غدي
يسرق رغيفو من ظروف معقدي
تا ياكلوا او يطعم ولادو الزغار
ما بيكفر البيكون ما بيسمع صلا
يما ببعض الناس ما عندو صِلا
بيكفر عندما بيلبس تيابو الجداد
وبيروح عا المعبد يصلي للحلا
وبيكفر البيروح قدام العباد
ينشلح صوب العلى وعينو على
بيكفر البيروح ايام العياد
يتناول القربان تا يغش الملا
بيكفر البيكون جمرا بالرماد
وتحت جلدو الناعم مخبي البلا