مرا ... متل الكذب

قصيدة للشاعر سمير هلال

مرا ... متل الكذب

صرلك عمر كل ما يطلّ الصيف

عاخصرك حزيران بتحطّي

وبتطلعي من الغمد مشقة سيف

وبين الندي و الورد بتغِطّي

تموز هيألك ليالي الكيف

تعرّي و بسحر خْيالك تغَطّي

حتى تمرّي مع لْوان الطيف

بتعلا السما و الأرض بتوطّي

حبك خطف قلبي بمرور الطيف

والحب متل الكذب بيخطّي

حسّيت حالي ع الخطِيّي ضيف

وبالشعر يمكن أول المرااااات

بكتب و ما بفهم على خطّي