حبّ الوطن
قصيدة للشاعر خليل روكز قالها في "أكرا" غانا
حبّ الوطن
من بعد ما الهجران لوّعنا
وبين البحر واليابسه ضعنا
وصلنا على شاطي الدّهب والنّور
وصورة وطنّا وأهلنا قشعنا
وصلنا على شاطي الدّهب والنّور
ودموعنا الكانت مواج بحور
من بعد ما عليها مشي البابور
تحوّلت موجة أمل وطموح
وقوّة ثقه بالنّفس تدفعنا
تحوّلت موجة أمل وطموح
تحمل كرم أخلاقكم وتروح
ونحنا أخدنا هون فيكم روح
وداع الأهل نزّل دموع كتير
وهالملتقى نشّف مدامعنا
وداع الأهل نزّل دموع كتير
وهون الفرح سيطر على التأثير
ومن كتر ما فيكم أملنا كبير
كلْ شي بِعِدنا بَعْدِنا بْلبنان
وحبّ الوطن بيضلّ جامعنا
وكلْ شي بِعِدنا بَعْدِنا بْلبنان
ورغم التّفرّق كلنّا إخوان
وعا قدّ ما يتفرّقو الأديان
شو همّنا وربّ السّما موجود
في كنايسنا وجوامعنا
شو همّنا وربّ السّما موجود
في قلب حنّا ومصطفى ومحمود
وليش تا نعيش بنوايا سود
ما زالنا إخوي من التّكوين
وكلّنا للرّبّ مرجعنا
ما زالنا أخوي من التّكوين
وكلّنا من فرد ميّي وطين
وبالإسم إنتو هون مغتربين
لو ما تمدّو سواعد المعروف
كنّا بقلب بلادنا جعنا
لو ما تمدّو سواعد المعروف
وتبعتو لبلادكم مصروف
وللتضحيّه لو ما مشيتو صفوف
كنّا بقينا بدون حرّيّه
والأجنبي مالك مرابعنا
كنّا بقينا بدون حرّيّه
ومتحكّمه فينا الأنانيّه
وإنتو يا روح الديمقراطيّه
لو ما عليكم نهتدي من بعيد
عالغرب لا جينا ولا رجعنا
لو ما عليكم نهتدي من بعيد
ما تعرّفنا عا كون جديد
وبالمختصر لا تسألو شو بريد
بريد إبقى بينكم عا طول
يا بترجعو عا بلادكم معنا