برج
قصيدة للشاعر خليل روكز القاها في برج البراجنة عام 1954
برج
يا برج لما فيك جمعتنا الظروف
ومركب امانينا ببحر عطفك رسي
عرفناك برج بتفتخر فيك السيوف
مداميك مجدك عالخلود مأسّسي
اسمك تلات حروف من أجمل حروف
طلعو من التاريخ آية مقدسي
باءك بنايه مكرّمه لملقى الضيوف
وراءك رمح مشكوك في صدر الزمان
و جيمك جمع أهل الذكا بالمدرسة
يا برج أبراج الدني كانو كتار
بعهد المضى تلّو الدني عنك خبار
برج بابل كان سلّم للنسور
طارت مع الأجيال حيطان وغبار
وحصار خيبر كان برج بالف سور
هدّو علي بزنود اقوى من الحصار
وما في برج الّا وهدم ركنو الغرور
الا انت يا برج أهل المرجلي
ضليت عالي وللأبد ركنك عمار
يا برج لما ربنا ترابك جبل
حط الجمال بجبلتك جوهر و عاج
بنجوم برج سهيل لو الكون انطبل
ما بيطلعو بيجنب نجماتك سراج
آلشمس بترصّع خدودك بالقبل
وغربك وشرقك للمتن خلقو سياج
شرقك على سفح الجبل هدّى الجبل
وغربك عا شط البحر بيهدّي المواج
كانو براج الماضي كبار
بعين الحاضر صارو زغار
ومش باقي غيرك يا برج
غنية عمر الأدهار