عندي قلب فاض الحب عنّو
قصيدة للشاعر خليل روكز
عندي قلب فاض الحب عنّو
عندي قلب فاض الحب عنّو
مش مصدّق اذا برتاح منّو
بيضل ينق رح يفلق سمايي
لا تهنّا ولا عيوني تهنّو
أنا لهالمنطقة سبقت البدايي
و ايماني و كفري هون جنّو
و كترة ما صرت ع جبيل جايي
نعمو حجارها و صارو عيوني
على غبرة حجارتها يحنّو
انطلق جوق الجبل بعد السكينة
متل نفحة عبير الياسميني
اختار جبيل نقطة انطلاقو
مطرح ما انطلق اول سفيني
وأنا من بعد ما عيوني اشتاقو
لأرض محبتي وموطن حنيني
متل عصفور ومضيّع رفاقو
طليق الجانح وروحو سجيني
الماضي راح وطوينا وراقو
وتركنا نغصة العمر الحزيني
ورجع ورد الصبا يفتح وراقو
على جبين الحلا ويحرم جبيني
رجعنا بعد ما الكاسات راقو
وضحكت زهوة الصيف الأمينه
وفصل الكيف جدد اتفاقو
وكنز الشعر كلّ من الخزينه
و يللى عالسياحه اليوم فاقو
وصارو يعملو للضيف زينه
يا ريتن بهالحفلة تلاقو
كانو كرامة جبيل وحلاها
عملو هون اضواء المدينه
بعلبك عطف دولتنا حضنها
ولبست بدلة العز الفخيمة
و بعد الموت رجعت من كفنها
على فينيقيا تعمل زعيمه
زعامتها جديده في وطنها
و انتي بالزعامة مستديمه
انتي بالتمن فقتي تمنها
لكن دشرك حظّك يتيمه
بالتاريخ انتي قبل منها
اسمك دولة الحسن العظيمه
انتي جوهره غالي تمنها
الك قيمه غصب عن كل قيمه
الجواهر قد ما الجاهل دفنها
الأرض ما بتاكل الدره الكريمة
بيجيها يوم يجلي الليل عنها
وبدها خزنة الامجاد ترجع
تفتّش عا جواهرها القديمه
كلما كبرنا و عمرنا الأخضر عسي
وراح الشباب وقلبنا الزهوة نسي
بيشد فينا جورج يونس عا جبيل
منعود نقشع حالنا بالمدرسه