بلكي بتحنّ
قصيدة للشاعر خليل روكز - موشح، مناجاة الأرواح
بلكي بتحنّ
يا مدوّبني ع شانك
لا تغيب كتير
عنّي ساعة هجرانك
عقلي بيطير
بحياتك إرجع ليّي
ومن ربّك خاف
لا تقسى كتير عليّي
إمشي بإنصاف
إرجع نام بعينيّي
والجفن لحاف
وببّو عيني خديديّه
ورموشي سرير
لا بتشوف ولا بتدري
نيّالي فيك
مدري بتبغضني مدري
عاملني شريك
إرجع تا أوفي ندري
الله يخلليك
صفّى طفل البيصدري
ختيار كتير
حاجي تكسّر بضلوعي
وتشعّل نار
وتخلّي بساط ولوعي
مرجة أقدار
دمعي شربتو من كوعي
رجعلك شي نهار
ولا تخلّي شواطي دموعي
مرسي بوابير
لو بعرف شو مطلوبك
بهدا وبكنّ
وبفرش روحي عا دروبك
بلكي بتحنّ
ولو بتخاف من ذنوبك
ما خاب الظنّ
ولا بتدشّر محبوبك
عا شوار البير
بين إيّابك وذهابك
فكري بيحتار
وشالح قلبي عا حسابك
في بيت النّار
دخلك ودّي بكتابك
صوره تذكار
دابت روحي عا غيابك
متل القصدير
دخلك إرحمني بغلبي
وعين المغلوب
دمعي سايقني سلبي
حسبني أيوب
هجرك دوّقني الصَّلبي
وجسمي مصلوب
وذكراياتك في قلبي
رووس مسامير
إرجع ليّي وصالحني
وحياة عينيك
بغيابك لا تسوسحني
بتشكّى عليك
وان كان فكرك تدبحني
أكثر من هيك
دخل عيونك ريّحني
دبحني بكير