ابن الحرمان
قصيدة للشاعر خليل روكز يبكي فيها نفسه
ابن الحرمان
جينا هياكل من تراب مفكفكي
وراجعين وليش نبكي ونشتكي
الأفضل نعزي بعضنا ونرجع ننام
نومة عساكر خاسرين المعركي
عامين بدنا نسل سيف الإنتقام
عاقدر تكى الدهور وماتكي
أو عالهوا عالنور يما عالظلام
أو عاملك مجهول من دون مملكي
جاية وماعندي غير دمع وإبتسام
دمعتي عاقصفة الغصن الذكي
وبسمتي فيها التمرد والملام
عاللي تعب فيي وقتلني ومابكي
رفاق الفقيد قبلي إستهدو عالمقام
متل ما استهدا الكرم عالبرمكي
ومن بعد ماعطيو المقام خير الكلام
بين على شِعري العجز والختيرة
وصفى سكوت العجز خير من الحكي
جايي تاإحكي وفي عليي واجبات
احكي وشوبحكي بهيك مناسبات
يمكن تعدو كلمتي كلمة قريب
أو عاطفة شاعر تحدى المعجزات
لومات شي إنسان طبعوطبع ديب
وكان حامل فرد ومرافق ذوات
بيصرفولوا المال والعذر العجيب
وبيحسبوه بخدمة الأوطان مات
لكن إذا بيموت شاعر أو أديب
وعامدبح بلادوحرق شمع الحياة
بلاواسطة بيموت ببلادو غريب
وإن كان عندو واسطة بيكرموه
بنيشان إستحقاق من بعد الممات
شو بيعمل النيشان والذكر الحميد
وصاحب النيشان صار عنا بعيد
وشو لذتو إن رشو على قبرو الزهور
أوعيدولوا كل طالع شمس عيد
وشو بينفعو إن إسمو تخلد عالدهور
وحتى الشهيد العظمتو بيت القصيد
لازم قبل ماينحتوه على الصخور
ينحتو التكريم لولاد الشهيد
لا.لا.بيجي التكريم عن يقظة وشعور
ونحنا ماعناغير هالباب الوحيد
لكن قدر مانسهر ونكتب سطور
لامنستفيد ولاالفقيد بيستفيد
وتنكرم الراقد بعتمات القبور
ونبعتو من القبر للعالم جديد
بدنا الحكومة يكون جانحها غيور
وتعلم ولادو وتسعف عيلتو
في وقتها منكون كرمنا الفقيد
في ناس قالوفلان ضحى بالجهاد
مين المجاهد قال طارق بن زياد
ومين بعد قالو اللي حمل عود الصليب
وسألتهن مين بعد قالو السندباد
وسألتهن مين بعد قالولي الغريب
يلي مهاجر من بلادعلى بلاد
وسألتهن مين بعد قالولي الطبيب
يلي المريض عليه لاقي الإعتماد
وضليت إسأل ناطرالواقع يجيب
والواقع مغطى بغايات العباد
ولما عرفت الأجوبة مش رح تصيب
رجعت فتحت عيني وسألت الإجتهاد
ماشفت إلا عدل راكض عم يغيب
لكن بعينين الضمير والإعتقاد
شفت الجهاد والتضحية بكاتب أديب
بيعصر فكارو وللبشر بيبيعها
حتى بتمنها يجيب مونه للولاد
المحروم لما الناس عنوبيسألو
مش هاليتيم اللي إنجرح مستقبلو
ولاالشمس يلي بتنخسف بشروقها
ولاالعمر يلي بينتهي من أولو
ولا الشجرة العاش العطش بعروقها
ولاالمريض العيلتو مابتحملو
ولا النعجة الجزارها بيسوقها
عامصير بتجهلو ومابتجهلو
المحروم من عدل الدني وحقوقها
هالوالد اللي بيشتهي أكلة حلو
وبيشتريهاومن قبل مايدوقها
بينطر تايمرق طيف إبنو فوقها
وبلذة الحرمان يطعمها إلو