افتتاحية خليل - ابيدجان افريقيا

افتتاحية للشاعر خليل روكز في ابيدجان افريقيا

افتتاحية

جينا على المهجر بدون جناح

متل الطيور البـ القفص كانو

تكسّر قفصنا وجنّت الأرياح

وكل منّا دشّر مكانو

وهون غطّينا بفكر مرتاح

وبعد المشقّة أمورنا هانو

متل شي جندي بدون سلاح

تسلح عندما شاف اخوانو

وابن العرب في في كل ديري وناح

ما في لغة بتصعب على لسانو

خصوصي ابن لبنان وين ما راح

من كتر ما عندو ذكا وطموح

بيشوف كل الكون اوطانو

والساعة اللي جيت فيها طير

وودعت اهلي وكل اخواني

خاطبت نفسي وقلت ما بيصير

ينسر قلبي بغير اوطاني

لكن لقاكم عاكس التفكير

وحرقة وداع الأهل نسّاني

وبيناتكم غذّيت روحي كتير

لطف ووفا ومعروف انساني

ولبنان بالتاريخ اسمو كبير

والناس بتعدّو سما تاني

وشو همنا لو كان حجمو زغير

ما زال ما فى ناحية بالكون

الا وفيها بيت لبناني

ويا حاضرين الجوق عالميلين

لا تسألونا هون شو قشعنا

قشعنا ورح منحكي على الحالين

بكرا متى عالموطن رجعنا

والشكر لو لايق قبال العين

كنا حكينا شكر تا شبعنا

لكن تركناهم علينا دين

حتّى ارض لبنان تجمعنا

تركنا ارض لبنان من شهرين

تا نشوفكم والشوق دافعنا

و كنا منبقى بينكم سنتين

لولا ما قصر الوقت مانعنا

بعد النا بهالبلد يومين

و معكم قبل ما نودّع ودعنا

يعني ودعنا بينكم روحين

و من هالدني منسافر و بتضل

صورة كرم أخلاقكم معنا