افتتاحية خليل - افريقيا

افتتاحية للشاعر خليل روكز في افريقيا

افتتاحية

صباح الخير يا دمعه حنوني

حنينك هزّني وحرَّك سكوني

اعملي خنسا برقِّتها وصداها

وبكتر الدمع خنسا لا تكوني

وإذا بقيِت دموعك عا هواها

وبليل الشَّوق لازملك معوني

كرامة دمعة المبدا ووفاها

اطلبي عيوني على حسابك عيوني

بدمعة ليل بكَّيتي الليالي

و بنور المعرفه حرقتي الجهالي

كلامك للدّني شهادة حقيقه

وبتاريخ القصايد درّ غالي

اخطري بجوّ الزجل حرّه طليقه

اكتبي وغنّي القصيده بصوت عالي

الشِّعر شو قيمتو بعين الخليقه

إذا ما كان دمعه أو رسالي

أنا عالضَّيم قبلك بات جفني

وإلي مع كل نجمة ليل صَفني

كنت بين القرايب والحبايب

غريب وما حدا منهم عرفني

بصبر أيّوب عاركت المصايب

وزماني لا رحمني ولا نصفني

وقفت ناجي أمل مجهول غايب

ابتسملي حظّ عمري بليل أعمى

وعلى أفريقيا المتلو قَدَفني

وبأرض النار والغابه الرَّهيبي

قلت بتخفّ عن قلبي المصيبي

وقلت برتاح من هَمّ القوافي

ومن الكانت إلي وصارت غريبي

وأنا عا مخدِّة الوسواس غافي

بنومي عود إبكي عا نصيبي

وعند ما فيق لاقي عا شفافي

كلام كتير واللي ما نسيتو

بلادي ومسرحي وأهلي وحبيبي