افتتاحية خليل - انطلياس

افتتاحية للشاعر خليل روكز في انطلياس

افتتاحية

أنا من وقت ما تقرّر مصيري

عشقت هالبلدة الحرّة الكبيرة

انطلياس أرزة بقلب رايي

و وفاها بعجنة المبدا خميرة

و أنا لو رجعت الدعوة لرايي

برغم ما مواهب الفيّي غزيرة

بزتّ مواهبي بدشّر سمايي

ان طلعلي بأرضها مفلش حصيرة

ما بدّي الشمس تغزلّي عباية

و لا بدّي اسم عنتر و الحريري

ولا بدّي الأنبيا تمشي ورايي

و لا بدّي مواهب الكون الكتيرة

أنا عايش حياتي بدون غاية

تا حافظ على صحابي الوفيرة

و صحابي فوق رتبة مستوايي

و حياة الشاعر بتبقى قصيرة

قلت عنّك جزيرة بالبداية

و ما كنت بكلمتي مريّح ضميري

و اذا بيكلفوني بالنهاية

تا احكي عا شبه ما شفت فيكي

بقلّك بحر و الدنيا جزيرة

قالو موطني ضيّق مجالو

قلت معليش لولا هيك قالو

الوجه الا بعينو ما تهنا

ونحنا عين هالكون وجمالو

وطنا من زهورو النحل جنّا

النجم بيضل أوطى من جبالو

وطنا بعظمتو التاريخ غنّا

البحر ساجد يصلي عا ديالو

قالو زغير قلت الكبر منّا

وقدر ما غابنا تهاجر شبالو

بدهن يرجعو منا ولعنّا

لأنو هالوطن هيّب دلالو

وعلى كل حال شو ما نقال عنّا

الحلو ان سبوه بيزيدو كمالو

وشو في بعد أكبر من وطنّا

بيكفي جاب ( فيروز) ونغمها

وعطى للكون(جبران) وخيالو