افتتاحية زين - في اول مباراة مع خليل شحرور
افتتاحية للشاعر زين شعيب في اول مباراة مع خليل شحرور وكان عمر خليل شحرور وقتها 20 عاما
افتتاحية
الي شهرين والمنجل بأيدي
جمعه غربله وجمعه حصيدي
بعدما القمح غربلتو وطحنتو
ما فَضّل غير هالحبه الوحيدي
يا بن شحرور اعلانك علنتو
وطلبت الحطّم الروس العنيدي
اجاني طفل من قبلك حضنتو
ووضعتو بمركزي بآخر قصيدي
وأنا وانت وشعب الله وانتو
اشهدو عليي إذا بحمّي الحديدي
وحق المصطفى وصهرو وبنتو
وشهر رمضان والكعبه المجيدي
لو ما انت والسيّاد كنتو
بفصيلة زين من ذات العقيدي
تا كنت الكون بالأحمر دهنتو
وصبغت البحر من اول طريدي
بس بقول بابور وشحنتو
الدرب سرحا ومسافي مش بعيدي
انا المنبر بريف العين صنتو
وهدمت قناطر الشعر العتيقه
تا عمّر للزجل قلعه جديدي
سمعت اخبار من عالم ذكيّي
يمكن فاهمه يمكن غبيّي
بيقولو زين عا اربع مرايا
كشف وجه الرجولي العنتريي
انا رح فهّم الناس الغبايا
العم بيحكو عن النفس الأبيّي
لو ما يكون في عندي قضايا
بتحكم عا حياتي العائليي
وسبع اطفال ورياشن طرايا
ومعيشتهن على الله وعليّي
كنت لو بيحكمو رجال السرايا
وملوك العرش والسلطه القويّي
ما بقبل سخّر زنودي القوايا
تا تشتش هالطفالا عا يديّي
وينك "يا علي" يلّي البرايا
بتشهد للشجاعه الحيدريّي
تعا اطعم تعا اكسي العرايا
تعا انقلني لدنيا سرمديّي
تعا من ساحتك زيح البلايا
قبل ما يقطعو الجهال راسي
ومتل ما صار فيك يصير فيّي