الخياط مجرم
قصيدة للشاعر خليل روكز
الخياط مجرم
يا بو القميص الأخضر مقلم
صلى الحلا عا اسمك وسلم
تأملت في لون القميص وفيك
لونك ولونو بالقلب علم
كتير لابقلك يا نيالو
مخبي سحر مجهول بخيالو
ومن كتر ما بصدرك قشع حالو
مش ناقصو غير بس يتكلم
شو حلو ومهضوم كسمو عليك
وفي خيط بيشابه خمر عينيك
وكلما زرارو بواسو ايديك
يا هل ترى متلي بيتألم
مكسر وحلوي فتحتو بالورب
من العاج للرمان فاتح درب
ولو يقشعو هتلر بنص الحرب
كان عملو بيرق وسلم
ما اتعذب الخياط بالتفصيل
ولا نبش بدفاتر التجميل
تعلم عند ما شاهدك بتميل
وقص ايدو بعد ما تعلم
شو مجرم الخياط عالارواح
بيضل يعملك تياب ملاح
قلو يخبي إبرتو ويرتاح
وحاجي قلوب الناس يتظلم
خليك دخلك لابسو خليك
لا لا اشلحو ما بقبل يخبيك
بغار منو بس يدقر فيك
وبفزع يكون اسرارك تسلم
هيدا غريمي آخ ريتو يبوخ
هيدا مدوخني قبل ما دوخ
دخل السما يا محيكين الجوخ
لا تحيكو متلو ولا تبيعو
من هالقماشه الخيطها مقلم ..