الصاروخ الروسي
قصيدة للشاعر خليل روكز ألقاها إثر إطلاق الصاروخ الروسي إلى القمر
الصاروخ الروسي
طل الربيع وغرد بعيدو
العصفور والنهر بأناشيدو
وراح النحل يبرم على الأزهار
منشان يوفيها مواعيدو
وصارت كفافي البِيض عالأشجار
تعطي الحلا للنور وتزيدو
حتى انحسد منها الصباح وصار
يدلق عليها العطر في إيدو
والورد طل وما نطر نوار
يتعب عاتفتيحو وتوريدو
تحدى المسك والخمر والخمار
والكرم وتربة عناقيدو
ورف الحجل جدد شبابو وطار
يبري على الصخرا مناقيدو
وتمرد الدوري على النجار
وغافلو وعشعش بقرميدو
ورجعت على حفلاتها الشعار
تالمنبر ترَقص عواميدو
مش هم كانو قلال يما كتار
كل فن وفي إلو سيدو
وبحيث كل شاعر إلو أنصار
من قديم الشعر وجديدو
نحنا فتحنا مدرسة أشعار
تايرتفع ونوصل الجمهور
عالجو يلي الذوق بيريدو
شوفو البشر وصلو على النجمات
اكتشفو وجود العالم التاني
ويمكن بعد أربع خمس رحلات
بيصير إلهن كون فوقاني
ونحنا اكتشفنا كون من غايات
تانفضل دياني على دياني
صواريخنا مذاهب وحزبيات
يعني صرفنا عمرنا كلو
بالبحث بين مسلم ونصراني
قالو المسيحيين عن يسوع
إنو ابن الله ومن الأمجاد
وقالت الإسلام شي ممنوع
كيف رب العرش عندو ولاد
وكل ما قصدت تغيير هالموضوع
وقلت خلو ربنا عاحياد
بيتهموني أخوت ومنزوع
وعندي لحب الكفر استعداد
نحنا بحرب الإقتصاد والجوع
ليش تانبحث برب عباد
ان كان عندو ابن أو مقطوع
خلو النتيجة لساعة الميعاد
حلوي العباده تضحيه وخشوع
عارنة الناقوس والإنشاد
بس مش حلوي على المجموع
كل جمعه ست سبع عياد
قومي معي حتى نشد طلوع
وعالإختراع نعلم الأحفاد
العلم بيخلي العبد مرفوع
والجهل للأحرار استعباد
أحرار نحنا وحقنا مشروع
الدنيا طريدي والذكي صياد
وحتى نصلح نقصنا المتبوع
بدنا التعصب ينمحي منا
ونلحم البولاد عالبولاد