القناعة
قصيدة للشاعر خليل روكز
القناعة
من صومعة شاعر ترك قصر الوجود
ودشَر مفاتيح الهوى لصحابها
وعصَب صبايا الجهل بمناديل سود
والبهورة بالفعل سَكر بابها
وبغابة غرور النفس خلا الأسود
تنحني لنعجة حقيقة رقابها
هيدا أنا بلشت إحلم بالخلود
وروح القناعة لبستني تيابها
نامي يانفسي نومة الطفل الصغير
وفي زاوية من الصبر خبي العنفوان
وإغفى بليل الفقر يا إسمي الكبير
وعبي جرارك من دموعي يا زمان
وضلك عطيني شوك ولغيري حرير
وخليك عني مغمض عيون الحنان
لابد مايعتز هالعبد الفقير
وعا عتم عمرو ينفلش نور الأمان
حاجي بقا يا سراج أفراحي تنوص
ولا تخاف من ثورة جنون العاصفي
مازال زيتك من بحر كبر النفوس
لو فَحمت شمامتك مابتنطفي
ويا وجه حظي قد مابدك عبوس
وبسمتك مهما تغيب وتختفي
بكرا بتجي عامبسمك بسمة عروس
وبتعود تغمرني بصدق العاطفي
ضلي معي ياقوة العقل السليم
وعني إرحلي يازهوة الطيش بسلام
ويا كبريا ويا لفظة الجاه العظيم
إنتو حسب عقلي غير باقي الكلام
شلَحت بدلة أطلس الجهل الفخيم
وحمَلت مسبحة الأبانا والسلام
ومطرح ماكان ينام جدي من قديم
عاجلد غنمة من القناعة رجعت نام