المواعظ
قصيدة للشاعر خليل روكز
المواعظ
يا عاشق الدنيا ومطامعها
وسابح بأحلام العدم معها
عاقد ما يلعب زمانك فيك
لاتحط نفسك غير موضعها
امشي متل ماالرب أوصالك
درب الهدى والنور أحلالك
ما بينفعك غير حسن أعمالك
مهما النفس بالجهل ترفعها
خليك عاغصون الفضيله طَير
وصوب النميمي لا تجِد السير
والله خلق للناس شر وخير
نقي طريق الخير واتبعها
واحفظ لسانك تاتعيش منسَر
وبطول حبل الحكي لاتنغر
وإن وصلت لحدك طريق الشر
في قدر امكانك امنعها
لاتعيش فتنة ولا تعيش ذليل
امشي مع القرآن والإنجيل
ومش كيف ما مال النسيم تميل
عينك إذا بتميل اقلعها
خليك حاسب للزمان حساب
ولا تغرك كترة الأصحاب
الأصحاب لما بيبرم الدولاب
بتصير تبرم عامنافعها
وإياك تاكُل عالفقير حقوق
وتظهر شماته عاشخص مشنوق
إياك تتكبر على مخلوق
الكبريا للذل مرجعها
ولوشفت نفسك للسما اتعليت
إياك تنسى محل ما تربيت
وإياك تعشق غير بنت البيت
الحرة الشريفة في طبايعها
امك على مرباك كافيها
ومتل الرمد للعين داريها
وبنتك إذا بتقصد تربيها
لين كلامك عامسامعها
مابينفعك خالك ولا عمك
ومنشان ما تخلي حدا يذمك
احفظ كرامة بيك وامك
هالغسلت وجهك بمدمعها