بحمدون شو حلوه لياليها
قصيدة للشاعر خليل روكز
بحمدون شو حلوه لياليها
بحمدون شو حلوه لياليها
جنه بتتغنى الدني فيها
نسماتها بترشح ندي وعطور
والشمس طفله عم تكاغيها
كروم العنب فيها بلا ناطور
تريات خالقها مضويها
بتفح فيها ريحان البخور
كلما الهوا ناغش دواليها
صيفها كلو غناني طيور
جاع الوتر لوما اغانيها
وتشرينها أخضر وكلو زهور
بياخد من الأرزة ويعطيها
وكلما بشتاها دنّق العصفور
بيفلّ تا يدفا بوادتها
بيوعى الربيع مدودخ ومسحور
من لهتة زنابق سواقيها
بحمدون مصيف نخبة الجمهور
وضيوفها بنسبة اهاليها
وكترة ما فيها للملوك قصور
انحسدت من الجنة وحواريها
من ربع جيل من العمر وكسور
الشحرور غنّا في ضواحيها
وأول قصيدة قالها الشحرور
وجايه انا كمّل قوافيها
بحمدون ست حروف اسمك بوجدو
لكن على نونك عيوني بيجمدو
ولو بستمحيلي احذف الحرف الأخير
بشكر الهي عالبقيه وبحمدو
ان ضلّ العلم تنعشر جيل
يحلّل أصل الجرزوني
بيطلع من بعد التحليل
اصل الخمر بحمدوني