بعشتا - جبيل
قصيدة للشاعر خليل روكز
بعشتا - جبيل
يا ارض الحب يسعدلي مساكي
جايه شاعرك يطلب رضاكي
وبعدما فارقك مده قصيري
رجع يبكي محل الكان باكي
الي فيكي من الماضي خميري
خميري من التغزل في صباكي
وانتي كتر ما ارضك كبيري
عطيتي الشعر اكتر ما عطاكي
كنت عا صخرتك قرٌر مصيري
ولما غاب عن جرحي دواكي
طلقت آخي طلقت صرخة ضميري
شلحت قلبي طعم سمكة حلاكي
وبفقش الموج عالرمل الحريري
سأليني شو سمعت بملتقاكي
سمعت إنكغة الطفلة الزغيرة
وصدى صوت الحبايب في هواكي
حبال الشمس هنّي و عم يغيبو
بيندبحو ع شطّك من قريبو
حتّى يغسّلو نعومة جريكي
و يعطو البحر من شهدك نصيبو
و لما بيوصلو الموجات ليكي
بيصيرو يبوسوكي تا يشيبو
و بعد الشيب بيدوبو عليكي
متل عمر الحبيب على حبيبو
(ادونيس) حطك عا يمينو
وبعشتاروت كان يحلف يمينو
وعندما صارت سنين المجاعه
التقو في اسمك الناصع جبينو
شالو (روت) منك والفظاعة
بقي (بعشتا) متل ما شايفينو
رح نرد الحروف بهيك ساعه
تا يرجع اسميك لاول سنينو
يا اخت جبيل مجدك ما تداعى
وعندما جبيل كترو حاسدينو
التفت صوبك تا يتموّن شجاعه
انتصر عالغزو واعتز بعرينو
وجبل لبنان هالكلو مناعه
لما هب في قلبو حنينو
بنى عا شطك الصخري اذاعه
تا يبعت لهفتو لمهاجرينو
انا عندى قسا وعندي وداعه
انا حتى عدوي ما بهينو
لكن عند فقدان القناعه
ضروري المدّعي نقرص عجينو
على كل حال ما بدها مراعا
شعر لبنان انتو مناصرينو
الشعر ازهار في حقل الزراعه
ولما العجرم بيخنق ورودو
بيصير العتب عالزارعينو