بلبنان وين ما رحت تنزيهة
قصيدة للشاعر خليل روكز
بلبنان وين ما رحت تنزيهة
بلبنان وين ما رحت تنزيهة
بتحصل على الكلمة و معانيها
الكلمة الخلّدها رنين السيف
عن عظمة بلادي و ماضيها
بالصيف فتحت صدرها للضيف
هيدي جريمة عا أهاليها
و مش بس فرحتنا بفصل الصيف
كل ساعة من عمر لبنان
عرس الطبيعة منقشعو فيها
يا مدينة الشعبك ديمقراطي
حسنك على افكارنا ساطي ا لله عطاكي من البياض جبين
فيه الحلا بيمجد العاطي
فيكي الورود مروج و بساتين
عطر الحلا بكمامها لاطي
و عا مبسمك خلقو من التكوين
بسمة بزوغ الفجر عا صنين
و دمعة غروب الشمس عالشاطي
مرة اجو اهلي وخلاني
وكل أصحابي وجيراني
وقالو إلي سافر على البلدان
الفيها الجمال الما إلو تاني
وفيها بشر بتقدر الفنان
و فيها حياة العز خلقانة
وفيها الوطن أكبر من الأديان
ومافي ديانة تعاكس ديانة
قالو إلي روح بتجي فرحان
وجيابك من المال ورمانة
وبتجيب عن حرية الإنسان
أصدق صور من شعب إنساني
وبتشوف شو فيها من الغزلان
بتوحي إلك قصدان رنانة
بتنسى الألم والآخ والحرمان
وغرام ام عيون دبلاني
ضلو على هالحكي شهر زمان
تا ياخدو كلمة عن لساني
ولو بتعرفو شو قلت يا اخوان
بحلفلكن بحياة اوطاني
قلتلهم في موطني قنعان
بالرغم عن فقري وحرماني
ما بريد إلا عيش في لبنان
ولا بريد الا موت لبناني