حفلة كاملة: المتين - زين وخليل
حفلة المتين بين زين شعيب وخليل روكز
التسجيل الصوتي الكامل :
<html5media height="720" width="1280">http://www.zajalsite.com/mp3/almteenzainandkhalil.mp3</html5media>
الحوار الكامل:
زين
خدو كلمة عطوها لالف جيل
بالشعر زين شعيب حاتم مش بخيل
ما عاد نفزع بين قال وبين قيل
انسان عندك نبع يا ابن العم شيل
غنو الشباب وبينو كثير وقليل
وساكت انا ومسلح بصبري الجميل
ما ضل بالميدان الا بوعلي
ان كنت قد الحمل شّرف يا خليل
خليل
نزلت عروس الشعر تمشي حنجلة
وتحت منها الارض عم تغلي غلي
يا زين كنك جيت تعزمني الي
شد العزيمة وقد مافيك اعتلي
من جهتي قبلت العزيمة وجيت ليك
عا شرط بدنا انت تبقى بو علي
/// اعادة ///
نزلت عروس الشعر حلوة مدللة
تهودج حلو ع ضهر مهرة محنجلة
وتحت منها الارض عم تغلي غلي
بيرخص الجوهر ومنطقها غلي
زين
شوباك يا حبوب قعطت الشريط
وفي كشتبانة قصدت تا تعبي المحيط
قبلت العزيمة وجيت ان كنك نشيط
خليك ساكت لا صياح ولا عييط
بتبقى بتحسب زين منو بو علي
ان ضل فيك محل مش آكل خبيط
خليل
مازالك مفصل تياب الانكسار
اسكر وعربد خبط واضرب حجار
نحنا بسلاح العقل النا الانتصار
وانكنت جايي للخبيط وللنقار
فتش على انسان متل حكايتك
يكون عقلو صغير وزنودو كبار
زين
العسكر عند ما تطل هيبة قايدو
بيشفرش على الاربع دروب موايدو
خصوصي المتل زين المعنى زايدو
رب السمى فن وشجاعة ورايدو
انكان الذكي غير الشعر مش فايدو
والحرب لا من شيمتو ولا عوايدو
ما كان عنتر عبس في زندو القوي
علق على بيت الحرام قصايدو
خليل
يا ارض ميدي تحت بطش العنفوان
ويا سمى شتي على الدنيا حنان
ويا صخر عني كون ابلغ ترجمان
عشخص جهلان الفحم والبيلسان
عنتر قوي بالعقل والقوي كمان
ولقصايدو سيفو اجير العقل كان
وشمشون من دون عقل كانت قوتو
بهنيك يا شمشون آخر ها الزمان
زين
شمشمون مجدو عاش بالعصر القديم
وشو ما عمل بفعايلو الله عليم
جايي ع بسم الله رحمن الرحيم
وانعوذ بالله من الشيطان الرجيم
لما لقيت الكون منو مستقيم
وقاصد على المسرح وناطرني الخصيم
شعري وشَعر شمشون جايبهن معي
منشان اقضي عالفهيم وعالغشيم
خليل
الايد اللي بتهدم بالعكس ع البانية
والراهبة ما بتنحسب للغانية
دقيقة حياتك عند غيرك فانية
دقيقة غرورك عند عقلي فانية
هامتك بكير صارت حانية
ما زال شجرة فقر حالك جانيي
شِعر وشَعر طلعت عا حالك جانيي
بالشِعر رح زغر مقامي وقابلك
وبالشَعر ببعتلك دليله تانيي
زين
زغر مقامك موت بديار البلي
وغني شعر يا هويدلك يا هويدلي
وعندما بتصبح دليلة يا خليل
بتقشع علي الزيبق بخدمة بو علي
خليل
في اربعين يازين من ماضي السنين
كان قايدهم علي بابا الحزين
وهلق انت والزيبق وابنك علي
النا الشرف صرتو تلاتي واربعين
زين
صرنا تلاتي واربعين يا رب عين
واحفظ عبادك عالشمال وعاليمين
والنا الشرف لما خليل روكز يجي
منصير ام الاربعة والاربعين
خليل
كنتو قبل مني تلاتي واربعين
فرقة علي بابا وبنعمة عايشين
صار في لكن راسين بوجودي انا
راس باب الغدر والبابا الامين
زين
البابا الـ بـ روما اسم مرفوع اللوى
كرمال عينو بصلب الخمسة سوى
لكن انت بالبابوية يا خليل
بابا حسن ما قدرت اوجدلك دوى
خليل
زين وحسن هودي ولادي وشي حسن
ولما حسن اكثر من الاول حسن
هوني رضيت على حسن وحرمت زين
ومن هيك صارت كنوتي بابا حسن
/// اعادة ///
زين وحسن هودي ولادي وشي حسن
الاول طلع منزوع والتاني حسن
هوني رضيت على حسن وحرمت زين
ومن هيك صارت كنوتي بابا حسن
زين
الزين لما شاهدك منزوع هيك
منك تبرأ وقلب خيو هفت عليك
بتقدر بتعمل عالعمر بابا حسن
لكن تا تعمل بو علي صعبي عليك
خليل
لما لقيت ابن مش طالع الي
عملت حالي بو حسن عن مرجلي
العيبة على البيكون اسمو بو حسن
عا شخص مش حرزان يعمل بو علي
زين
كنوة علي وكنوة حسن للديِن ديَن
هو مش الك هودي اسامي المسلمين
ومهما بهالاسمين تعمل مرجلي
اركع عند ما يطل زين العابدين
خليل
كان زين العابدين مؤمن جليل
وتا نقول يا رجع البست اسمو الاصيل
شو همني مهما يزيدو الانبيا
ما زال جد الانبيا اسمو خليل
زين
دشر خليل الرب نايم بالضريح
بسمع مسيحك قال كلمة عن صحيح
قال في انسان بعدي بيجي
وبيدعي انو مسيح ومش مسيح
خليل
يا واضع مقامك بمركز مش الو
رغم البشاعة الفيك بتسب الحلو
ليش تا بيحقلك تعمل نبي
وغيرك اذا بيحفظ امانة بتقتلو
زين
اسم الخليل لا تعملوا لعبة بيديك
هيدا اسم ما بيقبل زبونات هيك
انت مش حافظ امانة يا خليل
انت لابس اسم ومبهبط عليك
خليل
مظبوط اسمي فوق جمسي مكّبرو
وحاسب حساب البعد بدهن يظهرو
وانت العاجسمك اسم زين العابدين
كلما كبر عمرك حروفو بيصغرو
زين
اسم انصغر شو همني اسمي بلاه
البيهم انو الجسم يسلم من بلاه
بتقدر تقلي عن مسيحك يا خليل
بالاسم او بالروح بتعدو إله
خليل
الله عطا الدنيا اسم عا قدها
ولوما الاسامي الناس جهلت حدها
وتنقول جبنا روح اطهر من مسيح
وما كان الها اسم شو بتعدها
زين - قصيد
قلبك يا روكز فايق وغافي
وعقلك سميك كتير متعافي
ومهما بفلسفتك تشد طلوع
بيضل طولك طول صفصافي
تا يضل بكتاب الزجل مطبوع
اسمك، واحملكن على كتافي
شد الفرام وزمر على الكوع
وروّق وخلي منطقك دافي
بالاسم حاجي تكبر المشروع
متل البيمشي عا الجمر حافي
طنعشر اسم ما بيكسرولك جوع
ولا الابجدية قطر عا كنافي
الارواح مركب والاسامي قلوع
بتمشي بمشيئة سرها الخافي
وللروح بعمل اسم مش ممنوع
تيضل اسم الرب عا شفافي
ومنشان معنا ينتهي الموضوع
بعطيك جملة من قلب صافي
لما وقف عا الجلجلة يسوع
ما طلب منو الاسم بيو
قلو اعطيني قلبك وكافي
خليل – قصيد
يا زين خلي البحث بمحلو
ورد الجماعة بعد ما فلو
حاجي على ذوقك تحاكيني
حكي انت بتعجز تحلو
روح افتخر انك معاديني
وكول الخبز من قبل ما تهلو
اللي قال نحنا من فرد طيني
بيريد كبرك شو منعملو
نكرت الاسم يا زين عالهيني
والكون مبني عا الاسم كلو
ولو ما الاسامي بدينك وديني
كانو البشر ما بيعرفو يصلو
يا ريت فيك يا زين تهديني
عا جسم من دون اسم تا جلو
بتعمل الو من جوانحي سفينة
وبعززو وبعيش في ظلو
ورب السما القال العقل زينة
ولما لابنو عا السما دلو
مظبوط قلو قلبك اعطيني
طيب ، ولو ما القلب اسمو قلب
شو بتفتكر كان لازم يقلو
زين - قصيد
واحد عا اسمو حط امالو
وواحد بروحو كل رسمالو
وانتو انصفو بالفرق يا اخوان
ما بين جسم الشخص وخيالو
بالاسم صاحبنا خليل طمعان
شو ها الذكاوي الفيه نيالو
مش لايمو يمكن يكون فهمان
وخالو ذكي طالع على خالو
حاجي يا روكز بالاسم وهمان
من حروف حبر على ورق سالو
اسمك اذا شطبتو من الاعلان
ورسمك بقي بيبقى على حالو
ومحل روكز اكتب سليمان
او جورج ما بيبوخ مودالو
بالاسم مهما عملت مش خسران
لولا حرقتو شو على بالو
مليون اسم بساعتين زمان
بترشهن عالبي وعيالو
وبتمون الزنكيل والطفران
لكن اذا جسمك نزل عا القبر
صعبي عليك تعوض بدالو
خليل – قصيد
ما اطولك يا ليل احزاني
عا هيك منطق شعر وغناني
ووين الضماير والحقايق وين
نامت وعين البُطل سهراني
ووين المعري وعقل طه حسين
واليازجية وابن ريحاني
يروحو يجيبو مجمع البحرين
ويرصعوه بدر قصداني
نكرت الاسم يا زين كيف لك عين
وحطيت جسم بعينة التاني
بحيث الاسم عندك مرجح عين
وبتريد متلك بيع وجداني
جبلي جسم حيدر ابو الحسنين
وجسم عنتر عبس او هاني
او دلني ع جسم طير البين
وعا الانبيا العطيو الدني دياني
ماتو وضل الاسم جوهر عين
والله انعرف بالاسم فوقاني
ما في جسم خالد على الحالين
اخلص بقا من الوهم منشاني
تا ينتهي ها البحث بين تنين
بين الجنا للحق والجاني
وحتى تآمن بالاسم يا زين
فتش تواريخ الدني بتشوف
الاسم خالد والجسم فاني