دشّرلي الهوا العذري

قصيدة للشاعر خليل روكز

دشّرلي الهوا العذري

دشّرلي الهوا العذري بحالو

مش موجود لا تجنّ بخيالو

مرق عا شفّتك أوّل وتاني

وقلت عنّو متل ما النّاس قالو

تعا تا سمّعك هالأسطواني

عن الحبّ وعن خلودو وزوالو

البنفسو حبّ من طبعو أناني

وبنتفة هودسي مشغول بالو

الهوا ما باس خدّ البيلساني

لو ما غايتو يبيّن دلالو

النحل ما صار عالأزهار جاني

لو ما غايتو يموّن عيالو

والفلّاح ما زتّ الزّواني

لو ما غايتو ينقّي غلالو

والإنسان ما حبّ الأماني

لو ما غايتو يظهر كمالو

وما في بيّ بيحبّ الحضاني

وما بيسيهر عيونو عا طفالو

لو ما بمقصدو يكونو ضماني

لآخرتو متى الإيام مالو

وأنا بالحبّ مرمرني زماني

وكنت مسحور متلك بجمالو

لكن عندما عرفتو خياني

دشّرتو وقلت مالي ومالو

وصرت من غير قصد رندح غناني

بأسف تاجر عا كسرة راسمالو

وبين الكاس وشفاف القناني

سكر عمري وما ضيّع اعتدالو

وبعد السّكر جوّعني حناني

وجعت والجوع كافر احتمالو

وهالبيجوع والدنيا ملاني

شو للي بيجبرو تا يضلّ صايم

ما زال الحبّها اخدت بدالو