رأس الحكمة معرفة الله

قصيدة للشاعر سمير هلال

رأس الحكمة معرفة الله

ربّي يا عاطي النور هالة نور ... تْقبَّل صلاتي بموسم الأعياد

إنت الشمس والأرض عم بتدور ... حولك . و نحنا " زهرة العبّاد "

بتعرف ؟ اشتاق الكرْم للناطور ... و ضجْرو عناقيدو من الحسّاد

و شايف وطنّا خاطرو مكسور .... مشتاق يفرح متل غير بْلاد

حرب " السفربرلك " بظلْم و جور ... عم تنذكر ببلادنا وتنعاد

والفقر صاير في إلو جمهور ... ترْم العدد بيسكِّر العدّاد

قلوب الحزانى للصلى بخور ... و للحزن شمعه و للرجا ميعاد

والقهر طاغي عا شعب مقهور ... عايش ع قولِة هيك الله راد

شو فيك تعطي عمر للعصفور ... اللي واقع بمرمى ألف صيّاد

بعرف انا أنّك إنْت معذور ... ما خصّك بساديّة الجلاّد

و بعرف أمَلنا للرجا مَندور ... و زينة فَرحنا ليلة الميلاد

و بعرف بْطانة آدم المغرور ... مش ممكن يعمّ السلام الأرض

تا يرجعو كل الكبار ولاد