سرّ العمادي

قصيدة للشاعر خليل روكز

سرّ العمادي

سرّ العمادي من زمان بعيد

قانون مش عادات وتقاليد

كلّ دوله و في لها قانون

وكلّ إمّه وفي لها توحيد

ما بتكفي مسحة الميرون

والزّيت أو رسمة صليب بإيد

عماد المسيحي الحرّ بدّو يكون

بعمادتو موجود خوري وشيخ

يحطو بقلب الطّفل سرّ جديد

ويللي كبر فيكن مقام البيت

زرعتو بأيلول الخريف زهور

إنتو بقصيد العِزّ ألطف بيت

وإنتو بفجر النّور عين النّور

ومن جهتي بالملتقى اعتزّيت

واليوم فرّخلي جناح نسور

(بروكز ولبنان) ما انسرّيت

عاقدّ ما بوجودكن مسرور

ياشيخ قالو صاحبك خواّن

بايع ضميرو الحيّ والوجدان

وكلّ مبغض قال موّالو

وما أظلم الإنسان عالإنسان

لكن أنا تا كذّب القالو

وأعطيك عن حبّ الوطن برهان

من محبتي بلبنان ورجالو

سميّت إبني عا إسم لبنان

الاحزاب كترت بالدّني زيادي

وغايات ليل نهار بتنادي

واحد مفتّح عالشّيوعي عين

وواحد على تاني حزب غادي

وأنجق تلاقي بكلّ ألف تنين

بقيو بلا أحزاب ببلادي

إلّا أنا يا شيخ لي حزبين

أول حزب اشكر بمعرفتك

وحزب تاني عيّش ولادي

إنشالله السّفر بتسّكر بوابو

وترجع على لبنان غيّابو

وفي كلّ ضيعه نعمّر الزّيني

من بعد ما قلوب الأهل دابو

ويا زين* يا قاصد تهنيني

هنيّت فيك البيت وصحابو

ويا شبينة الميرون وشبيني

قدّيش بدّو يفتخر لبنان

بعرابتو وبجاه عراّبو