غفران

قصيدة للشاعر خليل روكز

غفران

يا لابسي من حسرتي بدلة هنا

وعم ترقصي ومخمّني نَوْحي غنا

لا تستغلّي ضعف شاعر عبقري

هيدا نبي وإلّا لحبّك ما انحنى

بحبّك محبّي إسمها الحبّ البري

ولو ما وجودك مات شعري بلا جنى

يا ريت بقدر إرفعك عالمشتري

وهرّبك من هون من درب الفنا

بجرّب تا إنساكي وقساوه بشتري

وبفتكر حالي إلي عنّك غنى

بيمرّ طيفك عا ضميري المفتري

بيبكي ضميري بمحكمة فحص الضّمير

وبيرجف وبيقول دخلك مش أنا

لو بتعرفي قدّيش هالقلب انقهر

لمّا ألم نفسك على وجهك ظهر

غيري أكل حقّي وما بقدر إدّعي

وإنتي الخطر ومخمّن عليكي خطر

أعمى عن الماضي أنا لا تفزعي

رسمك بعيني محتكر كلّ النّظر

وغير صوتك ما بقي في مسمعي

وصرت أطرش قدّ ما يحكو البشر

وسرّك يا عمري في عكس حبّك معي

سرّك معي أخرس ومدفون بحجر

وحُبِّك متل إسمك على شفافي وعي

وكلّ ما بْتُقْصُد شفافي تكتمو

بتكلّف عيوني بتوزيع الخبر

عرفت إنّك بالجريمه ملبّكي

وعم تتعبي تا تغسليها بالبكي

مش كلّ دمعه بتشتري عطف المسيح

ولا حجّة منافق بتمرق عا ذكي

إنتي قصدتي تزرعي حبّة مليح

طلعت ملح ناعم بجرح المشتكي

وبدل ما تشفي ألم قلبي الجريح

بنيتي عا ضعفي من المصايب مملكي

من جهّتي بجرمك ضميري مستريح

بيشهد على فعلك مكان المعركي

لكن يا عمري انكان بدّك للصحيح

بعرفك رح تطمعي لكن بقول

بحبّك وشو ما بتعملي بغفر لكي

وحياة ضعفي وقوّتك لا تزعلي

وبعد الجرم عن مركزك لا تسألي

بعدك معي بِبّو بعين الإعتبار

واكتر من الإبن الوحيد مدلّلي

لا تعوّدي عيونك عا دمع الإنكسار

إنتي قمح والقمح بدّو غربلي

ومعليش الله يسامحك والصار صار

درّ البحر كل ما وطي كل ما عِلي

إنتي غلطتي وغلطة عقول الكبار

بتنحسب مليون غلطه كاملي

مجبور إغفرلك خطاياكي الكتار

من ميل كرمال الألوهيّه المعك

ومن ميل تاني ما بِقي غيرك إلي

بجاه الأماني والمحبّه والحنين

بجاه خفقات القلوب المغرمين

بجاه الطّيور الزايفه فوق الغصون

بجاه البنفسج والحبق والياسمين

بجاه النّوايا الصّافيه وسحر العيون

بجاه دمعاتك وظلمك والأنين

بجاه البري المشلوح في عتم السّجون

بجاه السّفيني الما لِها شاطي أمين

بجاه الخمر والعاطفه بجاه الجنون

بجاه يللي بالحياة معذّبين

بجاه آخي ونهدتي وقلبي الحنون

ومن بين حرماني وعذابي بهالحياة

بقول الله يسامحك يا جوزفين