فكر عالي
اذهب إلى التنقل
اذهب إلى البحث
قصيدة للشاعر سمير هلال
فكر عالي
سكّرت باب الوقت عا حالي
و قلت بوقف هون أحلالي
تاري الزمن دولاب عم بيطير
ما بيشحط فرامات كرمالي
شو معتمه زنزانة التفكير
ضيّعت فيها خيط مغزالي
و منشان ما فكّر بعمق كتير
طعْوَجْت سنارة شغل بالي
خْيالي وقع خاتم بقلب البير
وما عدت قادر إشقل خْيالي
و رجعت فتّش عالصبح بكير
ولاطش ورى عصفور آمالي
و تا إزرع كروم المدى تصوير
لقمشت من قمح السمى الغالي
مبسوط حلمي ضل حلم كبير
حتى وأنا مدفون تحت الوقت
ما قبلت فكّر غير بالعالي