قالو إلي هاجر يا بو سمره

قصيدة للشاعر سمير هلال من حفلة بتاريخ 10 - 2 - 2016

قالو إلي هاجر يا بو سمره

قالو إلي هاجر يا بو سمره ... و جرّبلك من الحظ شي نمره

من حقّك تقايِسْ ورى المطلوب ... و تقطع إشاره بعدها حمره

قلْت : اتركوني " ناسك الشخروب " ... ما بين معلولا و حبنمره

صعب الفرات يروح ع الدانوب ... ويعكُس طريق الحج والعمره

و صعبه عليي عيش بالمقلوب ... وإترك أوابد راسها شمرا

بالدم . مش كل القلوب قلوب ... ومش كل زمره موافقه زمره

البخور مش للمبخره بيدوب ... بالمبخره بيدوب للجمره

و الشعر يلي عالشجر مكتوب .... مش للورق بيعيش للتمْره

و الحب بين الولف والمحبوب ... مش للعنب معصور للخمره

والشوق بكوارة صبر أيوب ... مش للحكي مشتاق للغمره

الشاعر بيبقى ع الوطن محسوب ... بالصدق . لا مكياج لا حمره

و معكن على هالمنبر المهيوب ... رح ضلّ تحت جوانح بلادي

وأمي ونظر محبوبتي السمره