لا تطمع بشاعر

قصيدة للشاعر خليل روكز

لا تطمع بشاعر

يللي نويت تعيش في ظلّي

شو قصّتك شو مصيبتك قلّي

كلّ ساعه بقشعك مع طير

وكلّ يوم وفي إلك هلّي

شو باك بتماشي جميع النّاس

وكلّ ساعه شفّتك عا كاس

ما زال في عندك محل نحاس

صار لازم سعرنا نغلّي

يللي الهوا جدّعلك غصونك

عندك قلب لا تلحق عيونك

ألله بعتلك شاعر يصونك

صرت تلعب فيه بالكلّي

لا تطمع بشاعر عبد عينيك

ولا توقّف رواياتك حواليك

يعني إذا بتضلّ تعمل هيك

بدّها براسك تطلع الفلّي

تذكّر عندما كنت حدّي تقول

يا كلّ عمري ويا أمل مجهول

وشو بعد بدّك يا ظريف الطول

أكتر ما حدّك إركع وصلّي

حبّيت عيرك جانحي بخشيش

تاريك ما بتحبّ تلبس ريش

معتاد في وادي الخمول تعيش

بتستصعب العيشي على التّلّي

رافقتني مدّه وأنا مأسور

وضوّيت عينيّي بليلك نور

فكّرت رح باكل نخاع طيور

عيّشتني عالصّبر والقلّي

ووعدتني وكان الوعد حرمان

وكلّ وعدك عاصفة بفنجان

وصابك بحبّي متل شي إنسان

قاصد يعبّي البحر بالسلّي

خمّنت حالك بالهوا تسلّيت

لا لا إنت سلّيت وانسلّيت

وبطمّنك لو عالسّما تعلّيت

بدّك توطّي قدّ ما تعلّي

انكنت قادر عيش عنّي بعيد

لكن إذا ما قدرت عنّي تحيد

بريد تخلق حالك من جديد

وتتحرّر وتكفر بكلّ النّاس

وفي وقتها بتعيش في ظلّي