مات الحبيب

قصيدة للشاعر خليل روكز

مات الحبيب

مات الحبيب و حدّ قلبي صار

بخاطرك يا خمر يا جبّار

بخاطرك يا عمّنا الخمّار

خبّي القداح بخابية فخّار

نكايه بكسر النّفس و التذّكار

مات الحبيب و أبّد سكوني

بخاطرك يا زهوة عيوني

زتّ الحمق و ارتاح يا جنوني

و عودي لدير العقل يا ظنوني

و تعلّمي التّوبه من الكفّار

مات الحبيب و شو بعد باقي

بخاطرك يا نهور يا سواقي

شو بعد بدّي بديرتك لاقي

إلّا صدى حبّي و أشواقي

و كلمة يا عمري و وشوشة أسرار

مات الحبيب و فاتني مسكين

بخاطرك يا كروم يا بساتين

بخاطرك يا معشر الحلوين

بخاطرك عا طول يا صنين

ما بقيت رح زورك و لا مشوار

مات المربّى جنّ يا مربّي

كتّرتها هالقدّ يا ربّي

استكترت فيّي نتفة محبة

و شلّحتني من ترابتك حبّي

و ما شبّعك هالكون يا ستّار

مات الحبيب تشحتري يا سنين

و يا حبّ يا أكبر من التّكوين

اكتب عا مدخل قبر "جوزفين"

ماتت باَخر يوم من تشرين

الخلقت بأوّل يوم من نوّار