مدح

قصيدة للشاعر خليل روكز

مدح

انا كل شي الي بنظم غناني

لصوب المدح ما توجه لساني

ما بمدح شخص احوالو كتيري

و لا تسّخر ضميري في زماني

و ما بمدح بيك حاكم عا جزيري

و لا بشكر ملك لولا غناني

و ما بمدح صاحب النعمة الكبيري

يعني الخزنتو جوهر ملاني

ان عطوني بالسما مفلش حصيري

حتى يشترو مني الاماني

بخلّي النار ترسملي مصيري

ولا بغيّر مصيري الاولاني

ما بمدح محبة بدون غيري

ولا ضحكة قمار البيلساني

لانو بقلبها حبة صغيري

سودا متل آخر عنفواني

ما بمدح عجنة المن دون خميري

مهما الجوع حاربني و رماني

و كل شي فضايل الخمرة غزيري

ما بمدحها و هيي بالقناني

فكاري عالمدح كانت قصيري

و يا ما المدح صورتو خياني

بس اليوم مرتاح بضميري

مدحت (البون) لما شفت عندو

زعامة مجرّدة و غيرة و تفاني