مرا ... تشكيليه

قصيدة للشاعر سمير هلال

مرا ... تشكيليه

شو بحبّ تنصمدي مقابيلي .... و بعيونك الحلوين توميلي

بحبّ الجمال يكون عقلو كبير ... و إنتي جمالك تقل . يا تقيلي

ضلّي عجسمك لبّقي تْنانير ... و ميلي على نغمة مواويلي

" برج بيزا " عاشق التصوير ... تصوّر معك إنتي و عمتميلي

لا تقلّقي عيون الفجر بكّير ... وتكون غفوة نومك تقيلي

لا تنقّطي كتفك بوشم زغير ... بيتحرقص البنّ البرازيلي

لا تلبسي النيلي بلا تزرير ... بيزمّ " دلتا النيل " ع النيلي

و لا تجدلي شعرك عطولو كتير ... بيغار " نيرودا " على تشيلي

و مرّه انشغل بالك من التفكير ... و سحرك إذا ما كان ع الميلي

خلقك بيطلع طلعة التفجير ... بس الحلى ما بيعدم الحيلي

بلمسه زغيره منّك وبيصير ... كل شي حلو بالشعر يوحيلي

قدّيش عندك فن بالتعبير ... لما طلِع خلقك على حالك

خلِقك طلِع فنان تشكيلي