مرا .. و طعمة مرا

قصيدة للشاعر سمير هلال

مرا .. و طعمة مرا

بلهفلك بأشواق مخضرّه ... و متل المُراهق لهفتي حرّه

عا معجبينك بقطع الإرسال ... و كل يوم بنزل عا ألف ضره

مع كل مره بكتبك موّال .... بيهمّني رأيك بكل مره

مع سقسقات المي بالشلال .... هم النبع يسمع رأي الجره

قولي لصدرك يعتق السلسال ... عيني من السلسال محمره

وقولي لخصرك يشلح الخلخال .... حتى إذا بايع أنا شرا

يمكن تقولي هالصبي محتال .... و بدّو شوي شوي إتعرا

تاج الدهب شو حجّتو ما زال .... غالي و حلو بْدرّه وبلا درّه

ما كان داخ الخيط ع المغزال ... لو ضل يلعب لعبتو برا

حلوه و مره متل شغل البال .... حزرك يا حزرك مين غير الشعر

بيعيش ع الحلوه وع المره