مزامير وطن ( 29 )

قصيدة للشاعر سمير هلال

أحد المُخلّع

حاجه تمرجح شعبك المظلوم ... مدّ و جزر بين الفُرس والروم

علّيت بابك وعْملِت جمّال ... ونسيت أنو العز ما بيدوم

صرلك عمر عطّال عا بطّال ... عايش تعيس من الهنى محروم

والفقر هاري نعمتك . والحال ... ما عاد يتحمّل أسى وهْموم

وهالطائفيه الفرنها شغّال ... وطعما العالم خبز عيب الشوم

شو صار شو اللّي غيّر الأحوال ... حتى الفضا بطّل يساع نجوم

وحامل على ضهرك خطايا تقال ... يعني سقالله عا زمن سادوم

مين اللّي قلّك تشتغل عتّال ... وتبرُك مع مخلّع ( كفر ناحوم )

وينو إلهك يجي يقلّك قوم ؟