مزامير وطن ( 54 )

قصيدة للشاعر سمير هلال

بيع و شري

إنت الكفيل . وشعبك الحطّاط ... و بيناتنا للأحمدَيي بْساط

بأزمه رح تعيش العمر عمريْن ... طلْعِت متل قانونك المطّاط

عجيابك بيتهافتو الإيدين ... و بْكلّ إصبع إيد في شفّاط

من يومها غرّقتنا بالديْن .... و ذكّرتنا بمستقرْضات شباط

غنّيلنا عصفورة النهرين .... شْبِعنا أغاني هابطه وعْياط

و احْكيلنا عن شاعر القطرين .... عن داروين . عن لوك .. عن سقراط

تدمُر بتسأل عن بعلبك وين .. و من بابل بيتوجّعو الأنباط

و إنطاكيا بعهدة غراب البيْن ... والقدس شافطها ( يهوشافاط )

جايه الفرح يرسم أريج العين ... و تلبس حريرك .. و المجد خيّاط

صبرك علينا .. يا عريس الزين ... يلّي عم يبيعوك بالمَتْليك

رح يشتروك دموع بالقيراط