مزامير وطن ( 64 )

قصيدة للشاعر سمير هلال

ذكريات مُهاجر

كان عندي بيت ... بشْوارع الليمون

عضْفاف نهر الزيت ... بكنيسة الميرون

سقفو ورق زيتون

كان عندي قلب ... قدّ المحبّه كبير

بيوسع جبال " الألب " ... واليوم ؟ صار زغير

وديِّق عليي كتير

كان حلمي جديد ... و إشطَح معو لَبعيد

و كان يا ما كان ... كان عندي كان

كل يوم ليلة عيد

أرضي الشلَحت تيابها ... عتْبِتْ عليي كيف ؟

غافلْت خبز ترابها ... ونقَّصْت منّو رْغيف

يا أجمل الإيام ... والذكريات الخام

إنتو امانه برقبتي

و بيت القصيد بضحكتي

يا رَجّعولي فرحتي

يا رَجّعولي الشام