نسوة الوعد

قصيدة للشاعر خليل روكز

نسوة الوعد

راح التّنين وراحت الجمعه كمان

وبعدني ناطر الصدفه من الزّمان

وبعدها عيوني عا دربك شايحه

تصوّر وتتأمّل خيالك وين كان

مسيهر على دربك نواطير النّظر

تا يشحدو عن طيفك الضّايع خبر

جمّرو عيوني بموقدة السّهر

وتكحّلو عيوني بسوء الإئتمان

ناطر وبالسّاعه عيوني مبنّجي

تا عقرب السّاعه على العشره يجي

قبل التّرم شفتو بنقله مغنّجي

وبعد التّرم صفّى بسرعة بهلوان

يا ريت كنتي مطرحي بهاك النّهار

تا تعرفي قدّيش صعب الإنتظار

ناطرك وبمهجتي بركان نار

وبمهجتي تلجات كانون الأمان

إنتي الوعدتيني وخلفتي بالوعود

وطلعت نهاية موعدك أحلام سود

كان وعدك أخضر بعمر الورود

ليش صفّى متل لون الزّعفران

عالنّهر بعدو طفل موعدنا القديم

جوعان عم يسأل على أهلو النّسيم

وان كان بدّك تتركي الموعد يتيم

بتزعّلي عليكي الحبق والبيلسان

ولمّا بقلب البنك شفتك واقفي

قلبي ارتعش رعشة غصن بالعاصفي

ويا ريت شوقك هزّ فيكي العاطفي

متل ما بيهزّ عاطفتي الحنان

انكنّو بصحرا موعدك ضاع الدّليل

إيّام الله كتار والجايي جميل

نقّي نهار يكون عا ذوقي طويل

يعوّض على نفسي خسارة موعدين

ويعطي ضعف تشرين شوقك عنفوان