نهدات

قصيدة للشاعر خليل روكز

نهدات

لاقيني انكنّك راضي

وفكرك مرتاح

تا نعيش بعكس الماضي

يومين ملاح

لاقيني بروحك لاقي

مشتاق كتير

وفوق جوانح أشواقي

يا روحي طير

حنّ ولا تحبّ فراقي

أحسن ما تصير

مثل العصفور الباقي

من دون جناح

بحبّك لا تطمع فيّي

بريدك مخصوص

إنت النّور بعينيّي

وإنت البصبوص

وقلبي الدّايب حنيّي

بحبّك مفقوص

لا تسكر بابو عليّي

وتخفي المفتاح

مرقلك من صوبي مرقه

وربّحني جميل

يما بعتلي شي ورقه

وهمومي شيل

عمري صار من الحرقه

مثل القنديل

الأصفر نورو عالفرقه

وزيتاتو شحاح