هيك الزعامه بدها انطون
قصيدة للشاعر سمير هلال كتب في بدايتها غنيت هالقصيده بافتتاحيتي بحفلة الزجل يلي دعانا إلا الحزب السوري القومي الإجتماعي بتاريخ 25 \ 11 \ 2016 بالشام - منفذية دمشق . مديرية القصاع
هيك الزعامه بدها انطون
هالأرض عم تبرم حجر طاحون
من وقت ما التكوين قلاّ تكون
كوكب ملان بعالم الأسرار
و سر الطبيعه عاقل ومجنون
نبيد الشتي بفخارة الخمار
و تشرين خمارة شهر كانون
موسم ورا موسم الزرع غْمار
و الخير متل الحق ما بيخون
هالأرض سلُّم وزنة الأشعار
والبحر عتنعشر بحر موزون
غليون دخّن غيم مش سيكار
والشمس قداحه لهالغليون
من هون عطيتنا السمى إنذار
حتى تشتّي غيمة الميرون
بتخرطش الرعد وبقدحة نار
بتقوّس علينا بفرد كبسون
هالأرض أم العقل والأفكار
بالزوبعه عولادها بتمون
مافي شفافيي بلا أزهار
و مافي رواقيي بلا "زينون "
يعني الخصوبه بدها عشتار
يعني السلم بدو غصن زيتون
هيك البطولي بدها احرار
هيك الوطن بدو وطنجيي
و هيك الزعامه بدها انطون