يا أمل عمري

قصيدة للشاعر خليل روكز كتبها بمناسبة راس السنة وعيد ميلاد ابنه روكز وارسلها لابنه من المهجر

يا أمل عمري

صار عمرك يا أمل عمري سني

العمر كلّو والسّعاده تكلّلك

وصرلي سني عم شدّ بالعيش الهني

وببكي إلو تا يحضنك ويدلّلك

وهيدا أنا عشوار مرج الولدني

عم بقطف زهور الرّجا وبشكّلك

حتّى السّني البتخيس من عمر الدّني

تخيس من عمري أنا وتطلع إلك

يا بيت روحي ويا هنا قلبي الحزين

لولاك زرع العمر كان بلا سبل

ويا صباحيتي وكنز عمري التّمين

عيديّتك من هون راحت للجبل

ومش بسّ باعتلك صباحيّة حنين

وعاطفة أشواق ودموع وقبل

باعت إلك من غربتي حوالة سنين

انشالله ببنك اللانهايه بتنقبل

شهرين صرلي مدشّرك قلبي احترق

ومش عم بشوفك غير لمحه بالمنام

ولو ما معي رسمك مصوّر عالورق

لا بيعقلو فكاري ولا بقدر بنام

وكل ما النّعس بالليل من عيني انسرق

بقول يمكن روكز اتكشّف وقام

وكل ما بشاهد طفل قدّامي مرق ،

بحملو وبشمشمو وبصير قول

بلكي الطّفوله لبعضها بتبعت سلام