يا عيد
قصيدة للشاعر خليل روكز
يا عيد
يا عيد يا ميلاد فادينا الأمين
كنت،افتكرتك شكل عن كلّ السّنين
بعدك تمنّيات للعيش الهني
ومعرض تياب جداد عند العالمين
شو معذّبك عا أرض صفرا متشرني
ما ضلّ بتراباتها نتفة حنين
وشو قصّتك كلما كبر عمرك سني
بتبودر شفافك بلون الميتين
شو جايبك عا هالدّني وأهل الدّني
إلّا بأصنام الدّهب مش قانعين
جيت السّني ومين فيك بدّو يعتني؟؟؟
ويفلش طريقك بون بون وياسمين
وحتّى الجرس صارت صلاتو محزني
وحبلو منوسر والشّباب مهاجرين
وبطمّنك هاك الدّيوك المدهني
الكانت تبشّر في قدومك عن يقين
تكوّمت صيحاتها ببطن الغني
ونحنا ان صحنا صياحنا بيطلع أنين
لا لا بفكّر مجيتك عن ولدني
ليش العذاب وإنت سيد العارفين
تعذّبت مرّه وشعبك بحقك جني
وبقيو تلاميذك بدمّك دايخين
مش رح تجي تا تشوف هيكل منبني
بدمّ الضعاف وساكنينو النّاصحين
مش رح تجي لو جيت عن جدّ و عني
بيكون صار اليوم دهر الدّاهرين
وتا نقول جيت وما إلك عنّا غني
أهلا وسهلا فيك مش مستتقلين
قعود حدّي ان ردت تعرف شو بني
تا خبّرك عا مصايبي من عند مين
زتتيتني مع ناس فيهن غشمني
عا قدّ ما في بعزّتك رحمه ودين
وعرّفتني عا جلف متعجرف دني
وفرجيتني في مهجتو حقّي دفين
وبتريدني إنسى حقوقي وانحني
ما زال عندي حقّ كيف بتريد لين
مصيبتي:عندي كرامه مبيّني
وقبالها موجود عندي تلات بنين
مصيبي الكرامه فوتها عالهيّنيي
ومصيبتي إترك طفالى مشرّدين
يا ربّ لو ما بالتّروّي تمدّني
ونتفة صبر عالقهر فيهن إستعين
ما كان في بالكون قوّه تردّني
سجّل وجودي في سجل المجرمين
هيدي مصيبي بسعرها مش متمني
في غيرها عندي مصايب محرزين
سمعلك يا سيدي هالمصيبه المزمني
تا تشوف قدّيش الذكي عايش حزين
...فكّرت رح لاقي حدا بيحبّني
بلّشت استعرض صفوف المارقين
صار القصير يشوفني ويسبّني
ويللي طوال شوي صفّو حاسدين
حنّيت عالأعمى وعطفي شدّني
مش عارفو مصنوع من ميّ وطين
وبعد ما فتّح عيونو وحدّني
شو قال؟؟!! ، في عندك علم بالباقيين
ما بظنّ انت خلقتني تا تسمّني
عفوك يا ربّي عبدك لأمرك رهين
وعا قدّ ما أكفر بملكك بعدني
قدّيس بالنسبه لكفر المؤمنين
ما بطالبك تا تردّ لي عمري الفني
وتردّني لسْعادة الدّنيا جنين
وكلّ هم الكون ما بيهمّني
وعا قدّ ما عندك مصايب هاتها
عا شرط عنّي لا تبيعد جوزفين