يا ورد

قصيدة للشاعر خليل روكز

يا ورد

ليلة شتي فيها رياح وبرد

والبيت باكي ناقصو وجودك

مدّيت إيدي سرقت زرّ الورد

وشمّيت منّو ريحة خدودك

وقلتلو يا ورد يا خلّي

احكيلي وبقلبك سرّ لا تخلّي

تخمين مش عم تسمع بهالليل

صوتها هيي وعم تصلّي

قرّب لحدّ الباب تاني ميل

ومن صدر مرمر نظرتك ملّي

اسألها بحِرفي بمين إلها ميل

ومتل ما بتجاوبك قلّي

وقلت يا ورد البشر أجناس

فيهن قساوي وفيهن ليوني

عم يركضو خلفي عيون النّاس

وخلفها عم تركض عيوني

وحيثو متل خدّك إلو تقدير

بلّشت فوقو قبلتي أطبع

وشمّو وما لي ،قلب شمّو كتير

فزعان يدبل قبل ما إشبع

وإنتي عرفتي كمّ صارو عام

ناطر واتسلّى بأوجاعي

وبتعرفي الموعود ما بينام

وقدّيش لازم ضلّني واعي

ولمّا عرفت الورد واقف سرد

عا بابك وعم يضحك بعبّو

تندّمت ليش قطفت زرّ الورد

بيجوز عندو ورد بيحبّو