إلى حوّاء

قصيدة للشاعر خليل روكز

بحرين

حاجي على سلّم تمرّد تطلعي … وتتألّهي وتتكبّري من غير وعي

انتي متل كلّ البشر ميّي وطين … وعالطّين ما في لزوم نفسك تقشعي

انتي خلقتي ضلع من جنبي اليمين … لا تنكري فضلي وجميلة أضلعي

عرفتك أنا وبعرف أساسك بنت مين … أصلك تراب وللتّراب بترجعي

فعالك نقط سودا بتاريخ السّنين … حاجي بحقل جهلك غرورك تزرعي

لو جيت إجمعلك حسابك عن يقين … إلّا صفر من صفر مش رح تطلعي

قدّمت بالماضي إلك رقّه ولين … وعا درب بيتك كنت فرفط مدمعي

ولّمّا عرفتك لا وداد ولا حنين … استغبنت دمعي وصرت قرقط أصبعي

كنت حبّك كنت عا عهدك أمين … وكان ذكرك صوت وحي بمسمعي

ولمّا عرفتك متل زهرة ياسمين … وللنسيم بتنحني وبتوقعي

تذكّرت حوّا الطلّعت آدم فطين … وعن ذكر إمّك قلت يا نفسي اقنعي

متل ما عملت بوالدنا الحزين … مش بعيدي بنتها تعمل معي

وإنتي إذا عندك بشرع الحبّ دين … مش ضروري درب إمّك تتبعي

يا مكبّرا من الكبريا الله يعين … يمكن عن سقوط الملاك بتسمعي

قدّيش ما صرلي بأمر عينك رهين … وغنّيلك قصايد وانتي تطمعي

وبعد ما عمري انتهى نوح وأنين … صرتي عيونك عالحواجب ترفعي

لازم تكوني ليّني متل العجين … حلّك بقا جهل وتمرّد تشبعي

آدم خضعلك من عهد ماضي دفين … ولليوم بعدك بالحقوق بتدّعي

ونحنا بعكس آدم وحوّا الماضيين … جيت منّك تار آدم حصّلو

وأجبرك قدّام مجدي تخضعي